近日天氣反覆，雨傘莫短，怪奇大雨，我想起兩年前香港的颱風山竹都是9月發生，當時我被老豆強迫到海旁實地視察災後環境。結果有感而發，但卻不是因為滿地垃圾。事後，我以《如果我老豆是退休漁民，颱風山竹過後他都說甚麼》為題，記錄了年代大事之中的一件父女小事，今天重新回顧。
十號颶風山竹小回顧
2018年9月，颶風山竹吹襲香港，掛起十號颶風信號成為年代大事。忘記了有幾大件事？維基百科幫到你：強烈颱風山竹對港澳地區之影響(按此) (欣賞有心人製作了對聯目錄😂)。以下幾項，應該有印象了吧。
漁民眼中的十號颱風
《如果我老豆是退休漁民，颱風山竹過後他都說甚麼》原文
以下內容寫不進歷史，但寫得進他自己的歷史。
由於颶風山竹的關係，老豆連續兩天兩夜留守在大哥的船上，昨晚回家的他今早醒來，馬上呻全身都痛，攤開手掌擦了擦都覺痛。
「點解痛呢？」我問。
「拉纜囉！看船囉！扯左成晚大纜，你話攰唔攰。」忘了說，我老豆是個退休漁民，不是如果。
父女對話 x 颶風山竹
車仔麵店內，新聞繼續報導災情。店員感嘆：「海洋公園都唔開嘍！」很好的開場白。我問老豆：「今次個風勁唔勁？」地球村村民無事講便講天氣，父女亦不例外。
「緊係勁啦！」
「有幾勁呢？」
「連我都話犀利，你話勁唔勁啦？成個海都係垃圾呀，幾多隻艇瓜左呀！我同哥哥望住對面樓個天台砰一聲，成個鐵皮爆炸咁，炸到上天，飄～飄～飄～飄～，再飄～飄～飄～飄～，再反落街呀。」
颶風下，就算死，都要穩定一隻船
老豆出海半生，「有咩風浪未見過呀！」對他來說不是諺語，最叻當自己是天文台。這一次，值得追問。
「有無試過更犀利的風暴？」我問。
「呢次最勁，真係，今次係船上我都真係驚。」
「咁你拉左幾多條纜呢？」
「頭四條囉，尾四條囉。」
「如果有其中一條斷左咁點算呀？」這次我真的好奇了。
「點算？諗辦法囉，點算！」
「冒住風雨都要出去再拉嗎？」真的會死人的。
「話你知，隔離隻大鐵船條纜八吋粗，二十任，即係八十米左右啦。」這算是回答了我的問題嗎？
「旁邊的遊艇，我叫佢香雞繩，幼到死，我話佢好似搵條線拉埋街，你估你放紙鳶咩。」不錯的草根修辭。
「如果條繩咁粗咁長，咁隻船咪要好多位先擺到？」我知道這條問題很白痴，等於問，如果個西瓜好大個，咪要咬好多啖先食完？
「救命纜黎架，你話擺唔擺呀？！」甚料他彈左句幾靚的bite。
「話你知，啲大鐵船犯規，未到一號風球就駛哂入黎，根本以他們的規格是不准駛入香港仔避風塘，應該去別的避風塘。」
「例如呢？」
「油麻地避風塘，或者屯門都得。其實最緊要控制住隻船，唔好比佢撞，撞撞下就散架啦。」
老豆催促我實地視察
話到此時，我的碗裡分別還有一塊蘿蔔、紅腸、和雞翼尖，他把筷子伸過來搶，「你做咩呀！」我要極速制止！
「你快啲落去睇啦，真係快啲啦，快啲食快啲食！」他皺眉，從來支持我緩慢進食的他生平第一次催促我要吃快點，異常離奇。
「落哂風球，啲船走哂就無野睇啦！你快啲啦。」他說。我真的忍不住很想笑。
「快啲返屋企攞相機，又話你自己係傳媒人。」我相當肯定從沒這樣稱呼自己。
「我仲有杯凍奶茶呀，唔好催啦，我嘔啦！」大佬，等等啦，紅腸終於嘴嚼到第49下了。
「我幫你飲！」
「你痴線架，你做咩係咁搶我啲野食姐！」說畢，我已把蘿蔔吞下，盡了力。
「鬼叫你咁慢！」
當天最好笑的陳述句
賣單，終於告一段落，但真的只是告一段落。然後我真的回家拿了相機再出門。電話響了，是老豆：
「下來了嗎？你快啲啦！真係快啲啦，又有三棵樹倒了啦！阿嫲知道都要唸經呀！」我想我聽到了全日最好笑的陳述句。
「你打黎就係為我同我講呢件事呀？」我問。
「係呀！快啲下來啦！」
我知道啦。
如果您喜歡我的文章，請在下面按5下Like！
這樣，您便可以贊助我的文章，而且無須花費分毫！
透過Google／Facebook帳戶註冊Likecoin，只花30秒！
多謝您支持創作！